Conecta na Ría

O pasado 26 de xuño, celebramos unha nova edición de Conecta na Ría, un networking que se celebra tradicionalmente o último venres de cada mes de xuño e que se ten consolidado como unha das actividades máis esperadas polos/as socios/as da entidade.

                 

Nesta ocasión, preto de 50 empresarios/as, emprendedores/as e profesionais participaron na xornada, reunindo asistentes procedentes de distintas comarcas e puntos de Galicia nun encontro pensado para favorecer a creación de novas conexións profesionais e fortalecer a colaboración entre proxectos empresariais.

A bordo, os participantes tiveron a oportunidade de compartir experiencias, intercambiar ideas e coñecer de primeira man iniciativas e negocios de diferentes sectores, nun ambiente distendido que facilitou a xeración de sinerxías e novas oportunidades de colaboración.

Un ano máis, a Ría de Ferrol converteuse no escenario perfecto para fomentar as relacións profesionais fóra do ámbito habitual de traballo, reforzando os vínculos entre os membros da comunidade empresarial e emprendedora.

                   

Desde AJE Ferrolterra queremos agradecer a participación de todas as persoas asistentes, que contribuíron a facer desta edición unha experiencia enriquecedora e un novo éxito de convocatoria.

A xornada concluíu cunha cea servida por Kilómetro Fuego Catering, mentres que Onda Viral Agencia foi a encargada de recoller os mellores momentos do evento para a súa difusión nas redes sociais.

Conecta na Ría reafirma así o seu papel como unha das actividades de referencia do calendario anual de AJE Ferrolterra, promovendo o encontro, a colaboración e o crecemento do tecido empresarial galego.